وارم اپ میچ، پاکستان انڈر 19 نے امریکا انڈر 19 کو 69 رنز سے شکست دے دی
سمیر منہاس نے شاندار 74 رنز کی اننگز کھیل کر ٹیم کو مستحکم بنیاد فراہم کی
-
ویب ڈیسک -
January 13, 2026
پاکستان انڈر 19 ٹیم نے ورلڈ کپ کی تیاریوں کے سلسلے میں کھیلے گئے وارم اَپ میچ میں شاندار کارکردگی کا مظاہرہ کرتے ہوئے امریکا انڈر 19 کو 69 رنز سے شکست دے دی۔
قومی ٹیم کی اس کامیابی میں سمیر منہاس کی ذمہ دارانہ بیٹنگ اور احمد حسین کی عمدہ آل راؤنڈ کارکردگی نے کلیدی کردار ادا کیا۔
میچ میں پاکستان انڈر 19 نے پہلے بیٹنگ کرتے ہوئے مقررہ اوورز میں 294 رنز کا مضبوط مجموعہ اسکور بورڈ پر سجایا۔
سمیر منہاس نے شاندار 74 رنز کی اننگز کھیل کر ٹیم کو مستحکم بنیاد فراہم کی، جبکہ دیگر کھلاڑیوں نے بھی اہم شراکتیں کر کے مجموعی اسکور کو قابلِ دفاع بنایا۔
جواب میں امریکا انڈر 19 کی ٹیم ہدف کے تعاقب میں زیادہ دیر نہ ٹھہر سکی اور پوری ٹیم 225 رنز پر آؤٹ ہو گئی۔ پاکستان کے بولرز نے نظم و ضبط کے ساتھ گیند بازی کی اور مسلسل وقفوں سے وکٹیں حاصل کر کے حریف ٹیم پر دباؤ برقرار رکھا۔
میچ کے بعد احمد حسین نے اپنی کارکردگی پر گفتگو کرتے ہوئے کہا کہ جب وہ بیٹنگ کے لیے آئے تو ٹیم کی دو وکٹیں گر چکی تھیں، اس لیے انہوں نے حالات کو مدنظر رکھتے ہوئے ذمہ داری سے کھیلنے کی کوشش کی۔
ان کا کہنا تھا کہ ٹیم کا مجموعی ماحول نہایت مثبت ہے، تمام کھلاڑی ایک دوسرے کو بھرپور سپورٹ کر رہے ہیں اور پوری ٹیم ورلڈ کپ جیتنے کے لیے پُرامید ہے۔
