ماہرین نے ذہنی نشوونما کیلئے سب سے بہترین مشغلہ بتادیا

اگر مطالعے کو دیگر مثبت سرگرمیوں کے ساتھ جوڑا جائے تو اس کے فوائد کئی گنا بڑھ جاتے ہیں

• 
  ویب ڈیسک
• 
  December 30, 2025

مشغلہ ایک ایسی سرگرمی ہے جسے لوگ اپنے فرصت کے اوقات میں انجام دیتے ہیں اور ہر مشغلہ آپ کو مصروف رکھنے کے ساتھ آپ کی خوشی اورصحت مندی کا باعث بھی بنتا ہے، تاہم ہر مشغلہ انسانی ذہن پر اثر انداز نہیں ہوتا۔

اگر ذہنی نشوونما اور فکری نقطۂ نظر سے تمام مشاغل میں سے کسی ایک کو سب سے طاقتور قرار دیا جائے، تو ماہرینِ نفسیات اور تعلیم کا متفقہ جواب ’مطالعہ‘ ہے۔

مطالعہ، خاص طور پر اگر اسے باقاعدگی اور تسلسل کے ساتھ کیا جائے، دماغ کے مختلف حصوں کو متحرک کرتا ہے اور انسان کی سوچنے، سمجھنے اور تجزیہ کرنے کی صلاحیت میں اضافہ کرتا ہے۔ ماہرین کے مطابق، یہ دماغی سرگرمیاں انسان میں تنقیدی اور تجزیاتی سوچ کو پروان چڑھاتی ہیں، جو نہ صرف ذاتی زندگی میں مددگار ثابت ہوتی ہے بلکہ سماجی اور پیشہ ورانہ زندگی میں بھی انسان کو بہتر فیصلے کرنے میں مدد دیتی ہے۔

یہ بھی پڑھیں: آپ مشغلہ کیوں اختیار کرتے ہیں؟ تحقیق میں اہم انکشاف

مطالعہ کی مدد سے انسان کی ابلاغی صلاحیتیں بھی مضبوط ہوتی ہیں، خیالات کو مؤثر انداز میں بیان کرنے اور تحریر کو واضح بنانے میں یہ اہم کردار ادا کرتا ہے۔ علاوہ ازیں، مطالعہ تخلیقی سوچ کو جِلا بخشتا ہے، توجہ میں اضافہ کرتا ہے اور یادداشت کو بہتر بناتا ہے۔

ماہرین کا کہنا ہے کہ مذہبی کتب، سائنسی کتابیں، فلسفہ، تاریخ اور معیاری افسانوی ادب جیسے ناول اور افسانے ذہنی تربیت کے لیے نہایت مؤثر ہیں۔ یہ تمام اصناف مل کر دماغ کی مختلف صلاحیتوں کو بیک وقت متحرک کرتی ہیں اور انسان کو گہرائی سے سوچنے کا عادی بناتی ہیں۔

اگر مطالعے کو دیگر مثبت سرگرمیوں کے ساتھ جوڑا جائے تو اس کے فوائد کئی گنا بڑھ جاتے ہیں۔ ماہرین کی رائے ہے کہ ایسا طریقہ انسان کی ذہنی نشوونما کو مزید تقویت دیتا ہے۔