پاکستانیوں نے رواں برس گوگل پر سب سے زیادہ کیا سرچ کیا؟

پاکستانی صارفین نے مختلف شعبوں سے تعلق رکھنے والی شخصیات میں غیر معمولی دلچسپی ظاہر کی

• 
  ویب ڈیسک
• 
  December 30, 2025

پاکستانی انٹرنیٹ صارفین نے 2025 میں گوگل پر سب سے زیادہ کیا سرچ کیا؟ اس حوالے سے رپورٹ سامنے آگئی ہے۔

رپورٹ کےمطابق پاکستانی صارفین نے مختلف شعبوں سے تعلق رکھنے والی شخصیات میں غیر معمولی دلچسپی ظاہر کی ہے، تاہم اس سال کے ٹرینڈز میں ایک دلچسپ اور حیران کن طور پر ایتھلیٹس کی فہرست میں سرحد پار سے تعلق رکھنے والے بھارتی کرکٹر ابھشیک شرما سب سے زیادہ سرچ کیے جانے والے کھلاڑی بن کر ابھرے ہیں، جس سے یہ بات عیاں ہوتی ہے کہ پاکستانی کرکٹ میں سرحد پار کی شخصیات میں گہری دلچسپی رکھتے ہیں۔

اس کے علاوہ پاکستانی کرکٹرز اور ابھرتے ہوئے ستاروں کی طرف بھی صارفین کی توجہ رہی۔ حسن نواز، عرفان خان نیازی، صاحبزادہ فرحان، محمد عباس اور صائم ایوب جیسے نوجوان کرکٹرز کے بارے میں معلومات کے لیے سرچ ٹرینڈز میں واضح اضافہ دیکھا گیا۔

سیاسی شخصیات میں، 2025 میں بانی پی ٹی آئی عمران خان سب سے زیادہ سرچ کی جانے والی شخصیت رہے، جو اس بات کا ثبوت ہے کہ پاکستان کا سیاسی منظر اب بھی عوام کی توجہ کا مرکز ہے۔

سیاست کے بعد، پاکستانی کرکٹ کے سابق فاسٹ بولر شعیب اختر اور معروف گلوکار عاطف اسلم بھی سرچ ٹرینڈز میں نمایاں رہے، جو اپنی فیلڈز میں عوامی مقبولیت کے لحاظ سے نمایاں پوزیشن پر رہے۔

یہ بھی پڑھیں: گوگل فوٹوز جلد آپ کے ٹی وی پر بھی دستیاب ہوں گی

پاکستانی شوبز انڈسٹری بھی صارفین کی دلچسپی کا مرکز بنی رہی۔ رپورٹ کے مطابق، 2025 میں اداکارہ ماہرہ خان، اقرا عزیز اور ہانیہ عامر گوگل پر سب سے زیادہ سرچ کی جانے والی شخصیات رہیں، جن کی نجی اور پیشہ ورانہ زندگی پر صارفین کی گہری نظر تھی۔

مرد اداکاروں میں فہد مصطفیٰ اور وہاج علی بھی سرچ ٹرینڈز میں سرفہرست رہے، جبکہ دانش تیمور نے اپنے حالیہ ڈرامہ سیریل “شیر” کی غیر معمولی کامیابی کی بدولت خبروں اور سرچ انجن پر چھائے رہے۔

یہ اعداد و شمار پاکستانیوں کی دلچسپیوں کا عکس ہیں اور اس بات کا اشارہ دیتے ہیں کہ پاکستانی صارفین کھیل، سیاست اور شوبز کے ہر بڑے اور چھوٹے واقعے پر گہری نظر رکھتے ہیں۔ ان ٹرینڈز کے ذریعے آنے والے سالوں میں نئے اسٹارز کی مقبولیت کا بھی اندازہ لگایا جا سکتا ہے۔