ملک کے بیشتر حصوں میں آج موسم گرم اور خشک، مختلف علاقوں میں بارش کا امکان
وفاقی دارالحکومت اسلام آباد اور گردونواح میں آج مطلع جزوی طور پر ابر آلود اورگرم رہنے کی پیشگوئی کی گئی ہے
-
سلمان علی اعوان -
June 25, 2026
محکمہ موسمیات کے مطابق بحیرۂ عرب سے مرطوب ہوائیں ملک کے وسطی اور جنوبی علاقوں میں داخل ہو رہی ہیں اور مغربی ہواؤں کا ایک کمزور سلسلہ بھی ملک کے وسطی حصوں میں داخل ہونے کا امکان ہے۔
محکمہ موسمیات کا کہنا ہے کہ موسمی کم دباؤ (سیزنل لو) اس وقت مغربی بلوچستان پر موجود ہے، تاہم اس کے باوجود آج ملک کے بیشتر علاقوں میں موسم گرم اور خشک رہنے کی توقع ہے۔
بالائی خیبرپختونخوا، جنوبی و شمال مشرقی پنجاب، شمال مشرقی بلوچستان، کشمیر اور ملحقہ پہاڑی علاقوں میں تیز ہواؤں، آندھی اور گرج چمک کے ساتھ چند مقامات پر بارش کا امکان ہے۔
وفاقی دارالحکومت اسلام آباد اور گردونواح میں آج مطلع جزوی طور پر ابر آلود اورگرم رہنے کی پیشگوئی کی گئی ہے تاہم شام اور رات کے اوقات میں اسلام آباد اور اس کے نواحی علاقوں میں چند مقامات پر تیز ہواؤں، آندھی اور گرج چمک کے ساتھ بارش ہونے کا امکان بھی ظاہر کیا گیا ہے۔
محکمہ موسمیات نے شہریوں کو موسمی صورتحال کے پیش نظر احتیاطی تدابیر اختیار کرنے اور تازہ ترین موسمی اپ ڈیٹس پر نظر رکھنے کی ہدایت کی ہے۔
