لاہور: پاکستان ویمنز کرکٹ ٹیم 10 فروری سے جنوبی افریقہ کا پانچ سال بعد دو طرفہ دورہ شروع کرے گی۔
حکام کے مطابق ویمنز کرکٹ ٹیم کے دورے کا مقصد آئی سی سی ویمنز ٹی ٹوئنٹی ورلڈ کپ 2026 کی تیاریوں کو حتمی شکل دینا ہے۔
فاطمہ ثنا دونوں فارمیٹس میں کپتان رہیں گی جبکہ سائرہ جبین اور ہمنہ بلال پہلی بار اسکواڈ میں شامل کی گئی ہیں۔
عائشہ ظفر، گل فیروزہ، تسمیہ رباب اور نجیہہ علوی ون ڈے اسکواڈ میں واپسی کر رہی ہیں، جبکہ ٹی ٹوئنٹی اسکواڈ میں ہمنہ بلال، سائرہ جبین، طوبیٰ حسن اور ایمان فاطمہ شامل ہیں۔
ون ڈے اسکواڈ میں ڈیانہ بیگ، نجیہہ علوی، صدف شمس اور سیدہ عروب شاہ کا نام شامل ہے، اور عائشہ ظفر، گل فیروزہ، منیبہ علی، نصرہ سندھو اور عالیہ ریاض دونوں فارمیٹس میں حصہ لیں گی۔
مزید پڑھیں: پاکستانی وکٹ کیپر سدرہ نواز بھی آئی سی سی ویمنز ٹیم آف ورلڈ کپ میں شامل
پری سیریز ٹریننگ کیمپ 1 تا 6 فروری تک کراچی کے حنیف محمد ہائی پرفارمنس سینٹر میں ہوگا۔
ٹی ٹوئنٹی سیریز کے تمام میچز ڈے اینڈ نائٹ ہوں گے اور پوچف اسٹروم، بینونی اور کمبرلے میں کھیلے جائیں گے۔
ون ڈے سیریز سے قبل کمبرلے میں 50 اوورز کا وارم اپ میچ ہوگا، جبکہ ون ڈے میچز بلوم فونٹین، سینچورین اور ڈربن میں ہوں گے اور دوسرے ون ڈے کو ڈے نائٹ رکھا گیا ہے۔
ٹیم کے کوچنگ اسٹاف میں مینٹور وہاب ریاض، عمران فرحت، عبد الرحمن اور عبدالمجید شامل ہیں۔ ٹیم مینیجر عائشہ اشعر جبکہ میڈیا منیجر رضا راشد کچلو ہوں گے۔
پاکستانی ٹیم 2021 کے بعد پہلی بار دو طرفہ سیریز کے لیے جنوبی افریقہ کا دورہ کر رہی ہے اور فروری 2023 میں بھی جنوبی افریقہ میں آئی سی سی ویمنز ٹی ٹوئنٹی ورلڈ کپ میں حصہ لے چکی ہے۔
ٹی ٹوئنٹی اسکواڈ: فاطمہ ثنا (کپتان)، عالیہ ریاض، عائشہ ظفر، ایمان فاطمہ، گل فیروزہ (وکٹ کیپر)، ہمنہ بلال، منیبہ علی (وکٹ کیپر)، نصرہ سندھو، نتالیا پرویز، رامین شمیم، سعدیہ اقبال، سائرہ جبین، سدرہ امین، تسمیہ رباب، طوبیٰ حسن۔
ون ڈے اسکواڈ: فاطمہ ثنا (کپتان)، عالیہ ریاض، عائشہ ظفر، ڈیانا بیگ، گل فیروزہ، منیبہ علی (وکٹ کیپر)، نجیہہ علوی (وکٹ کیپر)، نصرہ سندھو، نتالیا پرویز، رامین شمیم، صدف شمس، سعدیہ اقبال، سدرہ امین، سیدہ عروب شاہ، تسمیہ رباب۔
یہ دورہ پاکستان ویمنز ٹیم کے لیے 2026 ٹی ٹوئنٹی ورلڈ کپ کی تیاریوں کا اہم مرحلہ ہے اور ٹیم کی کارکردگی پر سب کی نظریں مرکوز ہوں گی۔
