9 مئی مقدمات کا فیصلہ؛ محمود الرشید کو 33، یاسمین سمیت دیگر کو 10، 10 سال قید

9 مئی کے جلاؤ گھیراؤ سے متعلق 2 مقدمات کا تفصیلی تحریری فیصلہ جاری

• 
  عبدالرحمان
• 
  December 26, 2025

لاہور: انسدادِ دہشت گردی عدالت نے 9 مئی کے جلاؤ گھیراؤ سے متعلق 2 مقدمات کا تفصیلی تحریری فیصلہ جاری کر دیا ہے جس میں محمود الرشید کو 33 سال، ڈاکٹر یاسمین، اعجاز چوہدری اور عمر چیمہ کو 10، 10 سال قید کی سزا سنائی گئی۔

عدالت کے مطابق سابق صوبائی وزیر میاں محمود الرشید کو مختلف دفعات کے تحت مجموعی طور پر 33 سال قید اور 6 لاکھ روپے جرمانے کی سزا سنائی گئی جبکہ ڈاکٹر یاسمین راشد، عمر سرفراز چیمہ اور اعجاز چوہدری کو 10، 10 سال قید کی سزا دی گئی۔

تحریری فیصلے میں کہا گیا کہ میاں محمود الرشید کو الگ الگ سیکشنز کے تحت سزائیں سنائی گئیں۔ عدالت نے جرم ثابت نہ ہونے پر 23 ملزمان کو بری کر دیا جبکہ رہنماؤں سمیت 7 ملزمان کو جرم ثابت ہونے پر قید کی سزا دی گئی۔

عدالت کے مطابق شواہد سے یہ بات ثابت ہوتی ہے کہ ڈاکٹر یاسمین راشد، اعجاز چوہدری اور عمر سرفراز چیمہ سازش کی میٹنگ میں موجود تھے۔

فیصلے میں کہا گیا کہ پراسیکیوشن کے مطابق ان رہنماؤں نے عوام میں اشتعال پھیلا کر جلاؤ گھیراؤ کی حوصلہ افزائی کی۔

تحریری فیصلے میں بتایا گیا کہ پراسیکیوشن کی جانب سے مختلف واٹس ایپ پیغامات، 70 سوشل میڈیا اکاؤنٹس کی تفصیلات اور فرانزک رپورٹس عدالت میں پیش کی گئیں جبکہ جے آئی ٹی نے بھی ملزمان کو قصوروار قرار دیا۔

عدالت نے اپنے فیصلے میں مزید کہا کہ ملزمان نے جے آئی ٹی رپورٹ کو کسی فورم پر چیلنج نہیں کیا اور اپنے حتمی بیانات میں خود کو بے گناہ قرار دیا، تاہم عدالت کے مطابق پراسیکیوشن اپنا کیس ثابت کرنے میں کامیاب رہی۔